• USD 468.56

  • EUR 497.56

  • RUB 7.3

  • CNY 67.18

26 Сәуір, 22:31:36
Алматы
+35°

16 Мамыр, 2018 Аймақтар

Шымкентте отбасымен демалатын алғашқы «Арбат» ел игілігіне берілді

Қаланың жасыл желегіне жаңа рең қосқан арбат әдемі гүлдермен көмкеріліп, жарық шашатын шамдармен безендірілген

Шымкентте отбасымен демалатын алғашқы «Арбат» ел игілігіне берілді. Бекет батыр көшесінен орын тепкен жаңа демалыс аймағының ашылу рәсіміне Оңтүстік Қазақстан облысының әкімі Жансейіт Түймебаев пен облыстық және қалалық мәслихаттың депутаттары.

Шымкент еліміздегі ірі қалалардың бірі екенін айтқан аймақ басшысы дамыған қалалардың барлығында халық демалатын орындардың көптеп орналасуы заңдылық екенін атап өтті. Сонымен қатар қаланы көркейтудің негізгі жұмыстарына тоқталып, атқарылып отырған жұмыстардың барлығы қала жұртшылығының игілігі үшін жасалып жатқанын жеткізді.

«Бүгін Халықаралық отбасы күні. Осындай күні отбасылық демалыс орны - Шымкенттің алғашқы Арбатын халықтың игілігіне беріп отырмыз. 1 шақырымға дейін созылған Арбат құрылысын екі айдың ішінде аяқтаған қала әкімдігінің жауапты басшыларына алғысымды білдіремін. Енді бұл жер қаламыздың ең тартымды демалыс орны болады деп ойлаймын. Мұндай демалыс орны алдағы уақытта қаладағы Асанбай Асқаров пен Бейбітшілік көшесінде де ашылады», - деді Жансейіт Түймебаев.

ОҚО

Айта кетейік, арбатта  жаңа шамдар ілініп, орындықтар қойылған. Ландшафт дизайны көз тартады. Қаланың жасыл желегіне жаңа рең қосқан арбат әдемі гүлдермен көмкеріліп, жарық шашатын шамдармен безендірілген. Ыңғайлы демалыс аймағында сонымен бірге велосипед жолағы да қарастырылған. Мұндағы 3600 шаршы метр аумақ көгалдандырылып, 2000 шаршы метр жерді аяқ жолдар алып жатыр. Бұдан бөлек, ол жерге 700-ге жуық жөке, талшын, аққайың сынды ағаш түрлері мен 1000 түп раушан гүлі егілді. Түнгі арбатты жарық етуге 76 көше шамдары мен 45 кіші торшерлер қойылды.

Қазіргі таңда мамандар арбаттың ерекше келбетін аша түсетін арканы құру жұмысын аяқтауда.  Жуық арада Бекет батыр көшесінің бұл бөлігі нағыз шығармашылық адамдарының орталығына айналмақ. Себебі бұл аумаққа Суретшілер үйін салу жоспарланып отыр.

Бұл күні аймақ басшысы Жансейіт Түймебаев  сондай-ақ  облыстық және қалалық мәслихаттың депутаттарына «Ескі қаланы жаңғырту» жобасы аясында атқарылып жатқан жұмыстарды таныстырды. Онда әкім «Қошқар-ата» өзені жағалауының енінен 10 метр, ұзындығы 1200 метр жер халықтың демалыс орнына айналатынын атап өтті. Бүгінде аталған жоба аясында Ордабасы алаңынан Өзбек көшесіне дейінгі өзен бойымен жүріп өтетін 300 метрден астам аяқ жол көгалдандырылып, абаттандыру жұмыстары жүргізілді. Сонымен қатар халық қалаулыларына Қошқар ата өзенінің жағалауында бой көтеретін «Қошқар ата» тұрғын үй кешенінің макеті көрсетілді. Жаңадан салынатын кешеннің құрылысы үш кезең бойынша жүргізіледі. Жоба толығымен жүзеге асқанда  208 мың шаршы метрді құрайтын, 3976 пәтерлі 61 көпқабатты тұрғын үй ел игілігіне тапсырылады деп күтілуде. 

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір