17 Мамыр, 2018 Аймақтар
ОҚО: Онлайн дәрісте адамгершілік пен жауапкершілік жайы сөз болды
Жиында жастар тәрбиесі, әсіресе қылықты қыздарымыздың, мінезді ұлдарымыздың бойындағы қалыптасқан қасиетті мінез-құлық мәселесі де әңгіме өзегіне айналды
Шымкент қаласында кезекті рет өткізіліп жатқан «Өнегелі бір сағат» іс-шараcында облыстық дін істер басқармасының маманы Медет Халықов жастар тәрбиесінде ұлттық бірегейлікті сақтау және құндылықтарды насихаттау, ата-анамен бала қарым-қатынасын нығайтуға қатысты оқушыларға дәріс оқыды.
-Бүгінгі жастар бұрынғылармен салыстырғанда өзгешелеу. Олардың ой-өрісі, талпынысы, сауық-сайран құруы, былай айтқанда, адами құндылықтары бөлектеу. Бірақ жастарымыз жалпы адамзаттық мәңгілік рухани-адамгершілік құндылықтардың да бар екенін естен шығармаулары қажет. Онсыз тұлға толыққанды қалыптаса алмайды. Жеке адамның, оның санасы мен тұлғасының қалыптасуына әсер ететін жағдаяттар мол. Айталық, оның ата-анасы, өмір сүріп отырған ортасы. Адам баласы күн сайын бір нәрсеге көңіл бөліп, ой түйеді, өмір бойы оқиды. Алайда, адам баласының тұлғалық сипаты жас кезінен бастап қалыптасады. Жас сәби табиғатынан таза, пәк. Бұл - адамның өмірден әлі ештеңе көрмеген, көңілге түймеген шағы. Әлемді енді-енді тани бастайды. Міне, дәл осы кезеңде ата-ананың, содан кейін білім беру мекемелеріндегі мұғалімдердің балабақшадан бастап, олардың бойына бірте-бірте рухани-адамгершілік құндылықтарды сіңіріп, жақсылық пен жамандықтың аражігін ажыратуға үйрету - маңызды іс-дейді, Медет Халықов.
Маманның пікірінше, отбасында ата-ана ұл-қыздарының елдің ертеңіне айналатынын, ұлттың болашағын айқындайтындығын есіне салып отырса, олардың бойында қоғам алдындағы жауапкершілікті сезінуі арта түседі. Адамдар неғұрлым адамгершілік туын биік ұстаса, рухани кемелденіп, бір-біріне деген жақындығын, бауырмалдығын тереңдетеді.
Жиында жастар тәрбиесі, әсіресе қылықты қыздарымыздың, мінезді ұлдарымыздың бойындағы қалыптасқан қасиетті мінез-құлық мәселесі де әңгіме өзегіне айналды. Осынау мінез-құлықтың астарында ұлт болып ұйысудың, елін сүйген, жерін сүйген патриотизм тұлғаның қалыптасып келе жатқаны ашық айтылды.
Қате тапсаңыз, қажетті бөлікті таңдап ctrl+enter басыңыз.
Пікір қалдыру
пікір