Мақтарал ауданында биыл 10 мың гектар жерге жүгері дақылы егіледі

Биыл Мақтарал ауданында 10 мың гектарға жерге жүгері дақылы егілетін болады. Қайта өңдеген жағдайда 25 түрлі өнім алуға болатын дақылды әзірдің өзінде бірнеше шаруа қожалығы эксперимент ретінде егіп көрмек. Сондай-ақ, ауданда алдағы 1-2 жылда құс фермаларын көбейту жоспарланып отыр.

Бұдан бөлек, ауданда мақта шикізатын терең өңдеу ісі жандана түспек. Нақтырақ айтсақ, ақ алтыннан жіп иіру, тоқыма өнімдерін даярлайтын ірілі-ұсақты цехтар салу көзделіп отыр. Бұл туралы «Хамро ата» шаруа қожалығының тыныс-тіршілігімен танысқан аудан әкімі Жамантай Бейсенбаев мәлім етті.

Аудан әкімі алдымен аталған қожалықтың мақта өңдеу зауытына ат басын бұрды. Мұнда қазір мақта егу науқанына қажетті тұқымдық шит әзірлеу және шитпен шаруаларды қамтамасыз ету жұмыстары жалғасуда. Мұнан бөлек, аталған шаруа қожалықтың иелегінде 7 гектар жылыжай бар. Онда биыл 5,5 гектар қызанақ пен 1,5 гектар жерге көктемгі дақылдардың бірнеше түрі егілген.

Қызанақ жылыжайын аралап көрген аудан әкімі анар бағының бүгінгі жай-күйін де сұрастырды. Сондай-ақ, аудандық тәжік мәдени орталығының төрағасына Қостанай облысына жер игеру науқанына ерікті жұмыссыз жастарды тарту мәселесін жүктеді. Нақтырақ айтсақ, танымал кәсіпкер Бахарадин Аблазимовтың иелігіндегі 950 мың гектар бидай егістігін игеруге жұмыс күші қажет болып жатыр екен. Меценат Қостанай өңіріне қажетті жұмысшыларды Мақтаралдан көптеп тартуды жоспарлап отырған көрінеді. Егер, сонда жұмыс істеймін деушілер табылып жатса, баспана алып беріп, тұрақты жұмыспен қамтымақ.

Осы ретте, аудан әкімі жаз айларында ерікті топты Қостанай өңіріне арнайы жіберетіндігін мәлім етті.