Денесінен 13 ине табылған 11 айлық сәби көз жұмды

Күрделі ота барысында денесінен 13 тігін инесі табылған емізулі бүлдіршін Өзбекстан елінің астанасы Ташкент қаласындағы жедел медициналық көмек көрсететін Республикалық ғылым орталығында көз жұмды. Бұл жайында сәрсенбі күні адам құқығы мен демократия институтының директоры Сайера Ходжаева өзінің Facebook парақшасында жазды, деп жазады Qamshy.kz ақпарат агенттігі rambler.ru сайтының мәліметіне сүйене отырып.

«Денесінен 13 ине табылған 11 айлық сәбидің өмірін сақтап қала алмадық», - деп жазады ол.

Естеріңізге сала кетсек, 11 айлық сәбиді қатты дене қызуымен Ферғана облыстық ауруханасына жеткізген болатын. Дәрігерлер баланы рентгенге түсіріп, денесінде 16 ине бар екендігін анықтаған. Сараптама нәтижелері ол инелердің баланың денесінде екі айдан астам уақыттан бері тұрғандығы белгілі болды.

Тоғыз сағатқа созылған күрделі ота барысында дәрігерлер баланың денесінен 13 инені алып, қалғанын тағы бір ота арқылы алып тастамақ болған. Балалар бөлімінің бастығы Хабибула Акимовтың айтуынша, бала ол иненің бәрін өзі жұтып қоюы мүмкін емес, себебі инелер баланың денесінің әр бөлігінде болған.