Балаларды "Отанымыз – Кеңес Одағы, астанамыз – Мәскеу" деп оқытып жатыр

Семейдегі есту қабілеті бұзылған балаларға арналған мектеп-интернаттың тәрбиеленушілері әлі күнге дейін орысша шумақтарды оқып, жаттауға мәжбүр болып келеді. Бұл туралы Егемен Қазақстан газеті жазды.

Мақала авторының сөзінше, бұл жағдайды Мемлекеттік қызмет істері және сыбайлас жемқорлыққа қарсы іс-қимыл агенттігінің жанынан құрылған республикалық арнайы мониторингтік топтың мүшелері анықтаған екен.

«Менің сөзіме сенбессіздер бәлкім. Бірақ шындығы осы, балаларымыз «Отанымыз - КСРО, елдің басты қаласы – Мәскеу» деп жазылған оқулықпен оқып жатыр», дейді арнайы мониторингтік топтың төрайымы Айгүл Соловьёва.

Республикалық арнайы мониторингтік топтың мүшесі Қобланбек Қожин өзінің фейсбуктегі парақшасында осы жәйтке қатысты интернат тәрбиеленушілерінің ата-аналардың бірінен шағым түскенін жазыпты.

«Наша Родина – Советский Союз», «Везде и во всем имя Ленина с нами» - Семейдегі есту қабілеті бұзылған балаларға арналған интернаттың балаларының оқитыны – осы.

Жаңа оқулықтар болмағандықтан, балалар Совет заманындағы, 1983 жылы шыққан оқулықтармен оқуға мәжбүр екен. Өйткені, жаңа оқулықтар жоқ. Өкінішке қарай біз әзірге мүмкіндігі шектеулі балаларға не қазақ, не орыс тілінде заман талабына сай бірде-бір оқулық шығара алмадық», - деп пікірін білдіріпті республикалық арнайы мониторингтік топтың мүшесі Рақым Ошақбаев өзінің фейсбуктегі парақшасында. 

Ал облыстық білім басқармасында Білім министрлігінің 2017 жылғы 27 шілдедегі №352 бұйрығымен мекемедегі сабақтар жаңартылған білім мазмұнына сәйкес оқытылатынын, ал 1987 жылы шыққан «Развитие речи» оқулығын педагогтар орыс тілі мен оқу сабағына қосымша жаттығу ретінде пайдаланылатынын жеткізген

«Мектепке дейінгі даярлық тобындағы сабақ жалпы білім беретін мектептердің 1-10 сыныптарға арналған оқулықтары (2000-2016 жылдары шыққан) негізінде жүргізіледі. 2018 жылдың 1 қаңтарынан 5-7 сыныптарда орыс тілі, химия, биология, алгебра, геометрия пәндері 2017 жылы шыққан жалпы білім беретін оқулықтармен оқытылып жатыр», - делінген облыстық білім басқармасы басшысының міндетін атқарушы Сайрангүл Жұмәділованың Білім және ғылым министрлігінің жалпы және орта білім департаментіне берген жауабында. 

Автордың айтуына қарағанда, облыстық білім басқармасы Білім министрлігіне берген жауабында идеологиялық тұрғыдан әбден ескірген, бүгінгі заман талабына мүлде сәйкес келмейтін оқулықтардың алдағы уақытта интернаттың оқу бағдарламасынан алынатыны-алынбайтыны жайында сөз қозғамапты.

"Әлде «қосымша ретінде» одан әрі оқытыла бере ме? Дегенмен де Білім министрлігі аталған жәйтке жіті назар аударып, тиісті шешім қабылдайды деп үміт етеміз" - дейді ​​​​​​автор.