Қазақстанда коммуналдық қызмет ақысы бір жылда 30 пайызға дейін қымбаттаған

Finprom.kz-тің зерттеуінше, осы кезеңде су тарту қызметтерінің бағасы жылына 33,9%-ға өсті, бұл басқа коммуналдық қызметтерге қарағанда жоғары болып отыр. Осыған ұқсас бағаның өсуі мынадай коммуналдық қызметтерде де байқалады:

орталықтандырылған жылыту – 30,9%;

салқын су – 30,8%;

қоқыс шығару – 30,7%;

ыстық су – 29,4%;

электр энергиясы – 19,9%.

Жоғарыда аталған қызметтердің бағасының өсуі қызмет көрсету саласындағы орташа бағаның өсуінен бірнеше есе жоғары.

Ал ұялы байланыс қызметтерінің бағасы бір жыл ішінде 12,4%-ға өсті.

Қызмет көрсетушілер бағаны көтеру себебі – инвестиция. Коммуналдық қызметтер мен байланыс саласы көп қаржыны, инвестицияны қажет ететін салалар. Инвестицияның болмауы Екібастұз, Риддер және еліміздің басқа да елдімекендерінде орын алған апатты жағдайларға алып келеді.