• USD 468.56

  • EUR 497.56

  • RUB 7.3

  • CNY 67.18

24 Сәуір, 04:14:30
Алматы
+35°

18 Мамыр, 2019

"Ұлы даланы ұран ғып" жаңа ән жарыққа шықты

Құлақты айтасыз, көзіме сайын даланы еркін жайлаған Сақ бабалар елестегендей болды...

Мерей Қарттың сөзіне жазылған,  әні - Ерлан Төлеубайдың «Ұлы дала ұраны» атты Данияр Рахымбайдың орындауында жаңа ән жарық көрді, деп хабарлайды Qamshy.kz ақпарат агенттігі.

Ол туралы Ерлан Төлеубай Facebook әлеуметтік желісінде бөлісті.

"Әннің де туу тарихы қызық. Кейде кеуде түкпіріңе қонақтаған әуеннің не айтқалы тұрғанын тап басып тани алмай ділгіресің. Сол ырғақ сені тыныш жатқызбайды, түн ұйқыңды төрт бөледі. Дегенмен мазаңды қашырып, жаныңды жай таптырмаған сол әуез, сол ырғақ шырылдаған балапаннан бір күні қанатын қомдаған қыранға айналады. Міне, сол кезде сен оны ұшыратын бағыт іздейсің. Бағыт - сөз. Сөз болғанда да, мірдің оғындай сөз, әуеннің өзегіне түсіп кететін сөз! Ал кейде керісінше, керемет өлең тыңдайсың. Сол сәтте жүрегіңде әлдене шымыр ете түседі. Ақынның аузынан төгілген сөзге көкейіңде әуен ілеседі. Тұла бойыңа діріл жүгіреді. Болды. Жаңа ән туды деген осы! Естеріңізде болса, жыл басында Елбасы жастармен кездескен. Сол жиында адуынды жас ақын Мерей Қарт бір ғажап өлең оқыған еді. Құлағыма бірден аттың дүбірі келді. Сол дүбір домбыраның күмбіріне ұласты ма, қобыздың ызыңына жалғасты ма, әйтеуір мені өзіне баурап алды. Құлақты айтасыз, көзіме сайын даланы еркін жайлаған Сақ бабалар елестегендей болды... «Ұлы дала ұраны» әнім осылай өмірге келді. Мерейің тасып жүргір Мерей Қарт бауырым мен талантты әнші інім Данияр Рақымбайға алғысым шексіз! Бағасын беру – сіздердің шаруа. Бірақ тыңдағанда құлақтарыңызға тұлпардың дүбірі келеріне сөз бердім!", - деді Ерлан Төлеубай.

"Ұлы дала ұраны" әнін осы жерден тыңдай аласыз       

Ұсынған: Маржан Сәбет

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір