• USD 468.56

  • EUR 497.56

  • RUB 7.3

  • CNY 67.18

28 Наурыз, 20:43:12
Алматы
+35°

09 Қазан, 2018 NEWS

Шымкент әкімі ұстаздарға таңғаларлық тосынсый жасады (фото)

Шыны керек, менің аты-жөнімді айтып, сахнаға шақырғанда төбем көкке жетті. Алғашында не сыйлық екенін білмедім.

Шымкенттік педагогтар көптен күткен баспананы жеңілдікпен кредиттеуге арналған сертификатқа ие болды, деп хабарлады Qamshy.kz ақпарат агенттігі  Sputnik Қазақстан сайтының дерегін негізге алып. 

Қала басшысы Ғабидолла Әбдірахымов ұстаздар қауымын кәсіби мерекелерімен құттықтап, бірқатарына тосын сый жасады. Әкім бұл мерекеде бірінші кезекте өз анасын құттықтағанын айтып берді.

Шымкент ұстаздары

"Өздеріңіз білесіздер, мен анамның мұғалім болғанын үнемі айтып келемін. Кеше өзім хабарласып құттықтадым. Бір қуанып қалды, негізі күнде көріп жүр ғой. Сіздерге сәлем айтып жатыр. Ол кісі қазір Сарыағаштағы үйде демалыста", — деп әңгімесін бастаған Ғабидолла Әбдірахымов мұғалімдердің кез келген адамзат үшін алар орны ерекше екеніне тоқталды.

"Әрбір адамның өмірінде ұстазы болады. Ол, әрине, алдымен анасы. Кейін балабақшадағы тәрбиешісі, мектептегі ұстазы, жоғары оқу орнындағы оқытушысы. Тіпті адам жұмысқа орналасқанда да бағыт-бағдар беретін ұстазы болады. Сондықтан мұғалімдер күні барлық адамзат үшін маңызды күн… Жұма күні елбасымыз өзінің халыққа кезекті жолдауын жолдады. Үкімет пен әкімдерге нақты тапсырмалар берді. Соның ішінде педагогтардың статусын арнайы заңмен анықтау туралы мәселе көтерді. Осы бойынша біз ұсыныстарымызды үкіметке жібереміз. Оны, әрине, өздеріңізбен ақылдасатын боламыз", — деді Шымкент басшысы.

Шымкент ұстаздары

Салтанатты шара кезінде 19 мұғалімге қала әкімдігі тарапынан "7-20-25" бағдарламасы бойынша тұрғын үйді жеңілдікпен несиелеуге арналған алғашқы сертификат табысталды. Яғни, әкімдік олардың әрбіріне тұрғын үйдің бастапқы жарнасының 10 пайызын төлейді. Осындай сыйлыққа ие болғандардың бірі – 15 жылдан бері ұстаздық жолда еңбек етіп келе жатқан №50 мектеп мұғалімі Әсем Тұралиева. 35 жастағы келіншек төрт баланың анасы. Осыдан алты жыл бұрын баспана алу үшін кезекке тұрған. Ал былтырдан бастап "Тұрғын үй жинақ банкі" арқылы шот ашып, ай сайын шамасының келгенінше қаржы құйып келіпті. Әкімдіктен берілетін сертификат туралы Әсем мүлдем білмедім дейді.

"Маған сертификат берілетін күні қалалық білім басқармасынан хабарласып, мерекелік шараға міндетті түрде қатысу керектігімді айтты. "Не үшін?" деп сұрағанымда, "Әкім құттықтайды" деді. Шыны керек, менің аты-жөнімді айтып, сахнаға шақырғанда төбем көкке жетті. Алғашында не сыйлық екенін білмедім. Кейін әкімдіктегілер түсіндіріп берді. Қатты қуандым. 11 жыл болды тұрмысқа шыққаныма. Ата-енемнің қолында тұрамыз. Бізден бөлек қайын ағам отбасымен тұрады. Осы ретте қала әкіміне ерекше алғысымды білдіргім келеді", — деді мұғалім. 

Айта кетейік, кәсіби мереке қарсаңындағы шарада сертификаттан бөлек  бірқатар ұстаздар қала әкімі атынан Алғыс хаттар мен сыйлықтарға ие болды.

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір