Садриддин Ахмедов Таиланд турнирінің жеңімпазы атанды

Қазақстандық боксшы Таиландта өткен халықаралық турнирде алтын алды деп хабарлайды Қамшы ақпараттық агенттігі 24.kz порталына сілтеме жасай отырып.

Былтыр жастар арасында әлем чемпионы атанған отандасымыз жартылай финалда филиппиндік былғары қолғап шеберін тізе бүктірді. Ал ақтық айқаста Рио Олимпиадасының күміс жүлдегері, өзбек спортшысы Шахрам Гиясовпен кездесуі керек еді. Бірақ көпшілік асыға күткен жекпе-жек болмай қалды. Кездесуден өзбек боксшысының өзі бас тартыпты. Осылайша Садриддин Ахмедов Таиланд турнирінің жеңімпазы атанды. Айта кетейік, 18 мемлекеттің кіл үздіктері қатысқан жарыста ел намысын 8 спортшымыз қорғаған еді. Оның тек үшеуі ғана жартылай финалға жолдама алды. Олар Азат Махметов, Ерік Әлжанов және осы Садриддин Ахмедов болатын.