“Енді Ворошилов емес...” Өскеменде көше атаулары қалай өзгерді?

Бүгін Өскемен қаласы шын мәнінде рухани жаңғырған күн болды. Облыс орталығындағы орталық көшелердің барлығы да саяси мағынасы әлдеқашан ескірген ескі атаулардан бір-ақ күнде арылды, деп хабарлайды Qamshy.kz ақпарат агенттігі Алтайньюс сайтының мәліметіне сүйеніп.

Атап айтсақ, Ворошилов – Шәкәрім, Революционная – Қалихан Ысқақ, Орджоникидзе – Сағадат Нұрмағамбетов, Дзержинский – Әміре Қашаубаев, Октябрьская – Мұхамеджан Тынышпаев, Комсомол көшесі – Жастар болып өзгерді. Ал «Жастар» саябағына даңқты партизан Қасым Қайсеновтың есімі берілді.

Бұлар тек басты-бастылары ғана. Өскеменде бүгін барлығы 37 көше мен даңғыл және саябақтар жаңа атауға ие болды.
Сонымен бірге Семейде, Риддерде, Курчатовта және Жарма ауданында көшелер мен ауылдардың атаулары өзгертілді. Аталған өзгерістерді облыстық мәслихаттың депутаттары бірауыздан қолдау, дауыс берді.

– Бұрынғы кеңестік заманда басқа өмір, басқа заман болды және де үлкен қателіктер жібердік. Енді сол қателіктерді қайтадан қайталамауымыз керек. Соның бәрін ескере келе, біз облыстағы көшелердің атауларын ауыстырғанда көпұлтты мемлекет екендігімізге де басты назарды аудардық, – деді облыс әкімі Даниал Ахметов сессияда.

Ұсынған: Назерке Лабихан