"Бізге Асқар Мамин келсін..." - төбесі құлаған жатақхана тұрғындары шу шығарды

«Бізге Асқар Мамин мен Бақыт Сұлтанов келсін!  Аудан әкімінен қайран жоқ». 9 наурызда төбесі құлаған Астанадағы жатақхана тұрғындары осылай деп ызаланып отыр. Бірнеше жылдан бері жергілікті билікті жағалап, талай табалдырықты тоздырған елордалықтар енді шыдамымыз таусылды дейді. Қанша хат жазып, мәселелерін айтқанымен осы күнге нақты шешім жоқ. Ал жуырда болған оқиғадан соң  тұрғындар тозығы жеткен ғимаратқа кіріп-шығуға қорқады. Бұл туралы Qamshy.kz ақпарат агенттігі Еуразия бірінші арнасына сілтеме жасап хабарлайды.
 
Оқыс оқиға 9 наурызда, күндіз сағат 12-ден аса болған. Жатақхананың төртінші қабатының тұсы опырылып,  дүкеннің төбесіне түскен. Абырой болғанда сол сәтте бұл жерде ешкім жүрмеген. Әйтпесе, кірпіштің астында қалар ма еді.

"Далаға шықсам кусок құлаған. Оның өзі бомба сияқты. Қайта балалар жүрген жоқ сол кезде. Дүкен жабық тұр мына, егер ашық болса талай адам кететін еді. Халықты қалай ойламайды, мен түсінбеймін. Бізді қойшы, жас балаларға обал емес пе, бәріміз кірпіштің астында қалсақ. Келсін Үкіметтегі Мамині бар, әкімі бар, көрсін. Туалет анау, аспан, дала көрініп тұр.
 
Қабырғасы опырылғалы екі күн өтті. Сол күні билік өкілдері, төтенше жағдай қызметінің мамандары бір келіп кеткен. Одан кейін жым-жырт. Тозығы жеткен нысанның ішінде көретін жері жоқ. 4 қабатты ғимаратқа, яғни жүзден  астам пәтерге бір дәретхана. Ол бірінші қабатта.  Оның да сиқы мынау. Түнде бару тіпті қорқынышты. Себебі, бомждар кіріп кетеді екен, - деп айтты жатақхана тұрғыды Нұрсұлу Махатова.

«Туалетін көріп тұрсыздар, осында таңертең кезекте тұрамыз. Отыруға қорғамыз. Төбемізден тамшы ағады. Иісін қорамен салыстыруға келмейді», - деп налыды жатақхана тұрғыны Азамат Дүйсекеев.

Құжат бойынша ғимарат 1972 жылы  салынған деп көрсетілген. Бірақ одан да бұрын бойкөтерген дейді байырғы тұрғындар. Автобус паркінің иелегінде болған. Кейін жекеге берілген. Қазіргі тұрғындардың 80 пайызға жуығы квартиранттар. Жағдайы жоқ үй иелері ғана қалған. Төбеден су сорғалап, жоғарғы қабаттарға жайылған. Қабырғалар сыз тартып, электр сымдары тоқ тартады екен. 

«Түнімен ұйқы жоқ. Күндіз күлкі жоқ. Шүберекпен сығып аламыз. Ағады да тұрады. Жылда жөндеу жасаймыз. Тарақандар жүр», - дейді жатақхана тұрғыны Гауһар Ахметова.

Кенесары 57/1 мекен-жайындағы жатақхана жаңадан құрылған Байқоңыр ауданына қарайды. Ауданның да, қаланың да әкімдері бір келіп көрмесе де, мәселемізді біледі дейді. Өйткені, тұрғындар талай рет хат жазған, талай барған. 2012 жылдан бері сүрілуі тиіс нысан әлі күнге жыр болып келеді. Жаңа Үкіметтің жасақталғанынан хабардар жатақхана халқы бүгін қала әкімдігіне де зор үмітпен барған. Бірақ, Бақыт Сұлтановпен кездесу бақыты бұйырмай, салы суға кетті.  Астана әкімі орынбасарының кеңесшісімін деген мына жігіт мардымды ештеңе айта алмады тұрғындарға. 

-Көрдік біз бәрін.

-Көрсеңдер, жазатайым оқиғаны күтіп отырсыздар ма?

- Біледі ол кісі. Ол бір күнде шешілмейді ғой.

-Біз  тіпті аудан әкімінің фамилиясын білмейміз. Ол бірде бір келіп көрген емес. Қашан болады жауап? Бір ай, бір жылға созыла ма?  

Уақытын айта алмаймын. 
 
- Астананың әкімдігіне келіп отырмыз. Ешқандай жауап жоқ. Сонда кімнен күтеміз. 

Іші сыз тартып,  су сорғалап, сырты опырылып жатқан жатақханаға кіруге, тұруға қорқып отырмыз дейді халық. Тез арада жергілікті билік бір шешім қабылдамаса  Үкімет үйі мен Парламентке, сол жағалауға  барып базынамызды айтамыз, - деп ашынып отыр. 

Астананың қақ ортасы, оң жағалау. Елорданың ортасында осындай ғимарат бар дегенге ешкім сенбейтін шығар. Шыдамы таусылған тұрғындар осы Целиноградта туып өскен Асқар Маминнің өзі келіп көрмесе, көмектеспесе қала әкімдігінен қайран жоқ деп ашынып отыр. 

«Бізге әкімдіктің өкілдері керек емес. Жаңа Үкімет, қала әкімі Бақыт Сұлтанов келсін.Сондай-ақ, Мамин Асқар Ұзақбайұлы. Ол осы жерді біледі. Сондықтан  бізді Үкіметтің келуін талап етеміз».

Ұсынған: Назерке Лабихан