Балуан Шолақ жайында көркем фильм түсірілмек

Ш.Айманов атындағы «Қазақфильм» киностудиясы Мәдениет және спорт министрлігінің тапсырысы бойынша Дулат Исабековтің сценарийі негізінде Балуан Шолақ туралы толықметражды көркем фильм түсірмек. 

 Киносценарий М.Әуезов атындағы қазақ мемлекеттік академиялық драма театрында сахналанған «Жаужүрек» пьесасының желісі бойынша жазылған, деп хабарлайды Қамшы ақпараттық агенттігі Қазақфильмнің баспасөз қызметіне сілтеме жасай отырып.

Қазіргі таңда түсірілім тобы толықтай жасақталған. Дайындық кезеңінде тұрған түсірілім фильмге қажетті киімдерді тігіп, реквизиттер әзірлеп, декорациялар түрғызып жатыр. Фильмнің түсірілімдері Алматы және Солтүстік Қазақстан облыстарында өтеді. Ал режиссері - Нұргелді Садығұлов».

Фильмге қатысты Нұргелді Садығұлов былай дейді: «Мен Балуан Шолақ тұлғасына 1998 жылы Т.Жүргенов атындағы өнер академиясында оқып жүргенімде қатты қызықтым. Сол кезден бастап, осы кісі жайлы фильм түсіргім келді. Балуан Шолақтың бойында ақындық, серілік, әншілік және алып қара күш те бар. Оның еліне, жеріне, отанға деген махаббаты әрқайсымызға үлгі боларлық. Менің ойымша, бүгінгінің жастары Балуан Шолақтай ерді білуі тиіс».

Фильмнің сценариі бірнеше жыл бойы жазылған және қайта өңделген. Түсірілім тобы фильмнің сапалы шығуы үшін арнайы мамандарды шақырған. Олардың қатарында: көркемдік жетекшісі С.Нарымбетов, көркемдік кеңесшілері Е.Төлеутай, Б.Ыстыбаев, Б.Беделхандар бар. Картинаға танымал актерлармен қатар, экранға алғаш шығып жатқан дебютанттар да түседі. Бірақ олардың есімдері әлі аталмай отыр.  

«Актерлар іріктелді. Алайда бас кейіпкерді әзір айта алмаймын. Себебі, екі актердің арасында таңдау үстіндемін», - дейді режиссер.