Алматыда MEDIA ҚҰРЫЛТАЙ басталды

Бүгін Алматыда қазақстандық БАҚ нарығын дамыту мәселелеріне арналған он бірінші MEDIA ҚҰРЫЛТАЙ конференциясы өз жұмысын бастады, деп хабарлайды Qamshy.kz ақпарат агенттігі. Жобаның жыл сайынғы ұйымдастырушысы әрі авторы – Қазақстан Баспасөз клубы.

Бас редакторлар, басылым басшылары, сарапшылар, саясаттанушылар, журналистер мен қоғам қайраткерлері отандық БАҚ нарығын дамыту мәселелері  жөнінде ой-пікірлерімен бөлісуде. Конференцияда ақпарат және коммуникациялар министрлігінің өкілі Бекзат Рахымов, Медиа альянс басқармасының төрағасы Арманжан Байтасов, Құқықтық медиа орталығының директоры Диана Окремова және өзге сарапшылар Қазақстан қоғамының жалпы әлеуметтік-экономикалық өмірі аясындағы медиа-нарықта бүгінгі таңда болып жатқан өзгерістерді талқыламақ.

Сонымен қатар цифрлық дәуірдегі бұқаралық медиа мәселесі де сөз болмақ. Жаппай цифрландыру бағдарламасын жүзеге асырып жатқан елдегі БАҚ-тың рөлі, орны қандай болмақ? Сарапшылар осы сұраққа жауап іздейді.

Қазақ тіліндегі БАҚ-ты дамыту мәселесіне де көңіл аударылады.

Осы орайда БАҚ жұмысының тиімділігіне талдау жүргізуге арналған дүниежүзі мойындаған технология – Chartbeat сервисін Қазақстанда іске қосу аясында шеберлік сабағы өтеді. Нью-Йорктен келген Chartbeat командасы қазақстандық БАҚ-тың бәсекеге қабілеттілігін көтеруге арналған жүйенің мүмкіндіктерін егжей-тегжейлі түрде көрсетіп, халықаралық басылымдардың табысты кейстерімен таныстырады.

Бұған қоса Factcheck.kz командасы фактчекингке арналған арнайы шеберлік сабағын өткізеді.

MEDIA ҚҰРЫЛТАЙ дәл қазіргі уақытта орыс тілінде жүріп жатыр. Ал түскі 14:00-ден бастап қазақ тілді спикерлердің қатысуымен мемлекеттік тілде өтеді.