Сәбиді 1, 5 миллионға сатқан ақхалаттылар ұсталды

Тараз қаласының прокуроры Жамбыл Сматов,:

— Анасы баласынан бас тартатын болған. Медицина қызметкерлері оны пайдаланып, пайда табу және өз ниетін жүзеге асыру мақсатында бір жарым миллионға сатылды деп жатырмыз ғой. Ол жерде әрқайсының қаражаттан өз үлесі бар.

Прокуратура бұл істің нақты қалай әшкере болғанын ашып айтпады. Белгілісі, баланы бауырына басқысы келген 39 жастағы әйел Тараз қаласының тұрғыны. Оның жеке басы жайлы өзге мәлімет жоқ. Осы дерек бойынша медицина қызметкерлерінен бөлек, сәбиді алушы да, туған анасы да, делдал да жауапқа тартылады. Екі акушер 12 жылға дейін жазаға тартылуы мүмкін. Олар тергеу қапасында жатыр. Ал тірі тауарға айналған нәресте балалар үйіне жеткізілді.

 «Үміт» балалар үйінің директоры Гүлайым Мәнібаева:

— Бұл бала кеше полиция қызметкерлерімен түнгі сағат 1:33-те бізге түскен. Шамамен 20 күндік балаға ұқсайды. Салмағы 3 келі 420 гр. Денесі таза, денсаулығы жақсы.

Азанда мен өзім кіріп шықтым, жағдайы жақсы. Бүлдіршінге әлі ат қойылған жоқ. Мұндағылар оны «белгісіз жан» деп атап жүр. Түбі жаңа туған сәби осы жерде қалатын түрі бар. Өйткені оның шешесі ана құқығынан айырылуы мүмкін. Ел арасында тірі тауардың анасы 36 жастағы Жамбыл ауданының тумасы екені айтылуда. Және оның бұдан өзге де балалары бар көрінеді. Ол қамауға алынған жоқ. Қолхатпен үйіне жіберілген,  – дейді.