Жансейіт Түймебаев мәдениет және өнер саласындағы қызметкерлермен кездесті

Оңтүстік Қазақстан облысының Түлкібас ауданында аймақ басшысы Жансейіт Түймебаев мәдениет және өнер саласындағы қызметкерлермен кездесті.

Басқосуда облыс әкімі өнер азаматтарын кәсіби мерекемен құттықтап, өңірдің рухани дамуы мен мәдени гүлденуіне айтулы үлес қосып жүргендері үшін алғысын білдірді.

«Елбасымыз Нұрсұлтан Әбішұлы Назарбаев тәуелсіз елімізде мәдениеттің, ұлттық өнеріміз бен салт-дәстүрлеріміздің өсіп-өркендеуіне, өткенін жаңғырта отырып жаңаша бағытта жұмыс жасауға ерекше мән беріп, үнемі назарда ұстап келе жатқаны баршамызға аян. Еліміздің болашағы жеке тұлғаның мәдениеттілігіне байланысты. Жеке тұлға мен қоғамның саяси, еңбек, қарым-қатынас мәдениетін қалыптастыратын арнайы мекемелер мен әлеуметтік орта. Сол мекемелердің бірі мәдениет ошақтары болса, адамды рухани азыққа бөлейтін мәдениет пен өнер қызметкерлері», - деді Жансейіт Түймебаев.

«Мәдени қызмет -мерейлі міндет» тақырыбында өткен мерекелік кеште облыс мәдениетінің дамуына сүбелі үлес қосқан 49 өнер қызметкері «Облысқа сіңірген еңбегі үшін» медалімен, облыс әкімінің Құрмет грамотасымен және Алғыс хатымен, облыс әкімінің арнайы сыйлығы, облыстық мәслихат грамотасы, «Нұр Отан» партиясы облыстық филиалы алғыс хатымен марапатталды.

Бұдан бөлек, шара барысында зиялы қауым қкілдері мен өнер адамдары Елбасының «Болашаққа бағдар: рухани жаңғыру» бағдарламалық мақаласының өңірде жүзеге асырылуы жайында өз ойларын айтып, мәдениет саласының дамуы бағытында ұсыныстарын жеткізді.

Айта кетейік, бүгінде облыстағы мәдениет саласында 5 мыңға жуық қызметкер абыройлы жұмыс атқарып келеді. Ал халыққа 736 мәдениет және өнер мекемелері қызмет етуде. Аталған ұйымдардың қатысуымен өткен жылы 31 мыңнан аса іс-шаралар өткізілді. Іс-шаралар негізінен «ЭКСПО-2017» халықаралық мамандандырылған көрмесі, «Түркістан - Түркі әлемінің мәдени астанасы» жылы және Елбасының «Болашаққа бағдар: рухани жаңғыру» бағдарламалық мақаласы аясында ұйымдастырылды.

Сонымен қатар, «Рухани жаңғыру» бағдарламалық мақаласындағы «Жаһандық заманауи Қазақстандық мәдениет» бағыты бойынша облысымыздың мәдениеті мен өнерін шетелдерге таныстыру мақсатында осы жылы Ш.Қалдаяқов атындағы облыстық филармонияның әншілері мен «Қазына» би ансамблі Түркия Республикасындағы «Кастамону - Түркі әлемінің мәдени астанасы» жылының ашылу салтанатына және халықаралық Наурыз мерекесіне қатысып, 6 мемлекетте өнер көрсетті.

Сонымен бірге, облысымыздың өнерпаздары Финляндияда өткен «Жұмбақ Жібек жолы» халықаралық фестиваліне қатысты. Ал Италияның Пезаро қаласында өткен XV «Читта ди Пезоро» халықаралық вокалистер байқауында жас өнерпаздарымыз Карина Нажмеддинова және Нұрқанат Тапивтер І орынға ие болып, Италияда 1 жыл тегін оқуға шақырту алды.