25 Сәуір, 2018 Аймақтар
Шағалалы Шардарада өнер фестивалі өтті
Шара «Мәдени мұра» бағдарламасы аясында Ұзын ата кесенесіне зиярат жасап, тарихымен танысудан басталды.
Елбасымыз Нұрсұлтан Әбішұлы Назарбаевтың «Болашаққа бағдар: рухани жаңғыру» бағдарламалық мақаласы аясында «Нұрлы жол-болашаққа бастар жол» облыстық өнер фестивалі Шардара қаласында өтті, деп хабарлайды Qamshy.kz ақпарат агенттігі.
Шара «Мәдени мұра» бағдарламасы аясында Ұзын ата кесенесіне зиярат жасап, тарихымен танысудан басталды. XIV-XV ғасырларға тән тарихи нысан Қазақстанның киелі жерлері тізіміне енген.
«Діни ілімді жалғастырушы, елге ізгілік пен адалдықтың нұрын себуші ұстаздық, әулиелік қасиетімен аңызға айналған Ұзын ата даңқына бас иіп, арнайы құран бағыштап келушілердің қарасы мол», - деді «Шежірелі Шардара» аудандық өлкетану мұражайы директорының орынбасары Н.Сейдуллаев.
Кесене аумағын абаттандыру жұмыстары да ерекше қолға алынған.
Фестиваль Шардара қаласындағы Абай алаңында жоғарғы және орта арнаулы оқу орындарындағы қолөнер шеберлерінің үйірмесі мен кітап көрмесі, «Болашаққа бағдар: рухани жаңғыру» флешмобымен жалғасып, Абай ескерткішіне гүл шоқтары қойылды.
Сонымен қатар, Шардара аудандық мәдениет және тілдерді дамыту бөліміне қарасты 9 ауылдық мәдениет үйінің меңгерушілері атқарған жұмыстары мен алдағы жоспары, халықпен мәдени байланысы жөнінде есеп беріп, ақсақалды қариялар мен ақ жаулықты аналардың қатысуымен «Саумалық» және бата беру салт-дәстүрлерін көрсетті.
Бұған қоса, 80-ге жуық туындылары туған жер мен табиғат, тарихи сәттері түрлі-түсті бояулармен сыр шерткен қылқалам шебері Айдарбеков Темірәлі Өсерұлының «Рухани жаңғыру» атты туындылар бұрыштамасы да өз ерекшелігін байқатты.
Аудандағы мәдениет үйлері мен клуб үйірмелері өнерпаздарының гала-концертінде халық шығармашылығының ән, би, күй, хор, цирк, драма сынды 18 жанрынан өнер көрсеткен шардаралықтардың Мәдени күні баспасөз конференциясымен қорытындыланды.
Айта кетсек, Шардара ауданындағы мәдениет үйлерінен ашылған 46 үйірмеде 1400-дей қатысушы дәріс алса, олардың ішінде 30-40 жас аралығындағы қатысушылар да бар.
Қате тапсаңыз, қажетті бөлікті таңдап ctrl+enter басыңыз.
Пікір қалдыру
пікір