Сейітқазы Матаев бостандыққа шықты

Алматы облысындағы Қапшағай қаласының соты Қазақстан журналистер одағының төрағасы, "қаржы жымқырды" және салықтан жалтарды" деген айыппен сотталған Сейітқазы Матаевтың өзін шартты түрде мерзімінен бұрын босату туралы шағымын қарады. Сот Сейітқазы Матаевты мерзімінен бұрын шартты түрде босату туралы шешім шығарды. Прокурордың қарсылығы болмаса Матаев 15 күнде босатылады.

Судья Сейітқазы Матаевтың адвокаты Мадина Бакиеваның, Матаев жазасын өтеп жатқан колония өкілінің уәждерін тыңдады. Сотқа Сейітқазы Матаевтың өзін әкелмеді. Ол сотқа түрмеден видео байланыс арқылы қатыстырылды. Бұл туралы Qamshy.kz ақпарат агенттігі Азаттыққа сілтеме беріп жазады. 

Сотта ЛА 155/4 колониясының өкілі Сейітқазы Матаевтың түрмедегі тәртібі "жақсы болғанын", "үлгілі мінез-құлқы үшін ынталандыруға ие болғанын" айтып, сотталушыны мерзімінен бұрын босатуды қолдайтынын мәлімдеді.

Мадина Бакиева Сейітқазы Матаевтың қазан айында 63 жасқа, яғни зейнет жасына толғанын айтып, заң бойынша зейнеткерлер жаза мерзімінің үштен бірін өтеген жағдайда шартты түрде мерзімінен бұрын босатуға болатынын айтты.

Сотта видео байланыс арқылы жауап берген колония дәрігерлері Матаевтың қан қысымы көтеріліп кететінін, түрменің санитарлық бөлімінде тиісті ем-дом ала алмайтынын айтып, оны шартты түрде мерзімінен бұрын босатуды қолдады.

Бұдан соң сөз алған прокурор Сейітқазы Матаев сот үкімі бойынша мемлекетке келтірілді деген 200 миллион теңге қаржылық залалды өтемегенін айтып, оны босатуға қарсылық білдірді. Сот кеңесуге шығып кетіп, біраз уақыттан соң сот шешімі бүгін кешкі сағат 17-де шығатынын айтқан.

Матаевтың шағымы бойынша соттан тікелей трансляция

2016 жылы қазанның 3-і Астананың Есіл аудандық соты Ұлттық баспасөз клубының жетекшісі Сейітқазы Матаевты "қаржы жымқырды" және салықтан жалтарды" деген айыптармен алты жылға, ал ҚазТАГ агенттігінің директоры Әсет Матаевты "қаржы жымқырды" деген айыппен бес жылға соттаған. Үкім бойынша Матаевтар ақпарат және коммуникация министрлігіне - 169 миллион теңге, "Қазақтелеком" компаниясына 140 миллион теңге қайтаруы тиіс болған. Матаевтар өздеріне тағылған айыпты мойындамайды.