Латын әліпбиіне қатысты ақпараттарды қамтитын портал іске қосылады

Елімізде латын әліпбиіне көшуге қатысты қажетті әрі пайдалы ақпарат алуға болатын интернет-портал іске қосылмақ,  деп хабарлайды Qamshy.kz ақпарат агенттігі. 

Бұл туралы бүгін Орталық коммуникациялар қызметінің алаңында өткен баспасөз конференцияда Ш.Шаяхметов атындағы тілдерді дамытудың республикалық үйлестіру-әдістемелік орталығының директоры Ербол Тілешов хабарлады. Сөзінше, қазіргі уақытта «Қазлатын» атты интернет-портал ашу жоспарланып отыр. Онда қолданушылар латын әліпбиіне көшуге қатысты барлық жаңалықтарды таба алады.

- Осындай сайттар, порталдар біздің жасап жатқан жұмысымызды жеңілдетеді. Қандай жұмыстар болып жатыр, қандай нәрселер істелу керек, қандай ғылыми шаралар бар, солардың барлығынан хабардар ететін боламыз сіздерді, - деді Ербол Тілешов.

Жаңа әліпби бірер күн бұрын Мемлекет басшысына таныстырылған еді. Ербол Тілешовтың айтуынша, жұмыс тобына елімізге танымал 5 ғалым кірген. Ал, әліпбидің жобасын жасауға атсалысқан мамандарға қосымша қаражан төленбеген.

Латын әліпбиіне көшу – қазақтың төл дыбыстарын ашуға септігін тигізеді. Бүгін Ш.Шаяхметов атындағы тілдерді дамытудың республикалық үйлестіру-әдістемелік орталығының директоры Ербол Тілешов Орталық коммуникациялар қызметінде осылай деді. Оның айтуынша, келесі жылдан бастап осы салада қызмет атқаратын арнайы мамандар дайындалады.  

Естеріңізге сала кетейік, бірер күн бұрын Мемлекет басшысына әліпбидің жаңа нұсқасы таныстырылған болатын. Әліпбидің жобасына қатысты 20 мыңнан астам адам түрлі пікір білдірген. Олардың көпшілігі әліпбиге байланысты, сонымен қатар, жекелеген дыбыстар мен енгізілу ерекшелігіне байланысты болды.

«Біз Елбасына диграфпен кіргенбіз. Ол кісі, ол жерде өзінің ұсынысын айтты және ол ұсыныс өте дұрыс болды. Бізде ондай ұсыныс болған, бірақ біз ортақ мәмілеге келе алмағанбыз. Сол ортақ шешімді Елбасы тауып берді», - деді Ербол Тілешов.