Дариға Назарбаеваның қызы тұрмысқа шықты (фото)

Президент Нұрсұлтан Назарбаевтың немересі, Дариға Назарбаеваның жалғыз қызы Венера тұрмысқа шықты. Той Алматыда 23 маусымда өтті.

Венера атақты Шайжүнісовтер әулетінің ұрпағы Даленмен некелесті. Дален Алматыда туып өсті, әл-Фараби атындағы Қазақ ұлттық университетінің заң факультетін бітірген.

Венера – қазіргі таңда студент, анасы Дариға Назарбаева бастаған қайырымдылық акцияларымен айналысады.

Венера мен Дален екі жыл бұрын танысып, жақын араласқан көрінеді. Биыл мамырдың басында екі жас некелерін қиған.

Ал той Алматыдағы Ritz-Carlton қонақ үйінің салтанат сарайында өтті. Шараға жастардың ең жақын туыстары мен достары жиналды. Елбасы мен Қазақстан Республикасының бірінші ханымы Дален мен Венераға ақ баталарын беріп, бақытты отбасылық өмір жолында сәттілік тіледі.

Үйлену той қазақы салт-дәстүрлерге сай өтті. Тойға Дариға Назарбаеваның досы, шығармашылық серіктесі Филипп Киркоров келіп, жастарға ерекше сый тарту етті.

Дариға Назарбаеваның отбасында Венерадан бөлек екі ұл өсіп жатыр. Бірі Асылжан 7 жаста, сонымен қатар немересі Сұлтан да 7 жаста.