Бозымбаев Елбасына келесі жылы «бензин тапшылығы болмайды» деп уәде берді

Нұрсұлтан Назарбаев Энергетика министрі Қанат Бозымбаевты қабылдады, -деп Qamshy.kz ақпарат агенттігі Ақордаға сілтеме бере отырып жазады.

Кездесу барысында министр  Елбасына мұнай өңдеуші зауыттардың жаңа заманға сай өзгеруі барысындағы жанар-жағармай материалдары нарығының жағдайын түсіндірді. Елбасы «Қазақстандағы мұнай жетіспеушілігі Энергетика министрлігінің жанар-жағармай материалдары нарығындағы шешімдерді өз уақытында қабылдамауынан болды» деді.

– Энергетика министрлігі еліміздің отын-энергетика мәселелеріне, соның ішінде ішкі нарықты жанар-жағармаймен қамтамасыз етуге жауапты. Елімізде оның тапшылығына байланысты орын алған ахуал Үкімет пен Энергетика министрлігі тарапынан немқұрайлылық пен жауапсыздыққа жол берілгенін көрсетіп отыр. Сіз биылғы мамыр айында мұнай өңдеу зауыттарына жөндеу жұмыстарын жүргізу кестесін бекіттіңіз. Күзде үш зауыттың екеуі жөндеу үшін тоқтатылатынын білдіңіз. Мұндай жағдай жыл сайын қайталанып келеді. Соны біле тұра, алдын-ала дайындалып, халықты қамтамасыз ету үшін қажетті көлемде жанар-жағармай жеткізуге тиіс едіңіз. Олай болмады, – деді Қазақстан Президенті.

Сондай-ақ, Елбасы министрліктің жанар-жағармай нарығындағы ахуалды тұрақтандыруға бағытталған бұған дейінгі шараларының тиімділігі төмен болғанын атап өтті.

– Сіз ұсынған жақсы бастамалар аз емес. Олар менің тарапымнан да, Үкімет тарапынан да қолдау тауып келеді. Жанармай тапшылығын болдырмау үшін бағаны мемлекеттік реттеуден бас тарту ұсынылды. Алайда, нарықта тағы да жанар-жағармай жетіспеушілігі орын алды. Осыған байланысты, Үкіметтің ұсынысы бойынша сізге сөгіс жарияладым. Бұл – қызметтен босатылғанмен бірдей, – деді Мемлекет басшысы.

Сондай-ақ Қанат Бозымбаев Қазақстан Президентіне Павлодар және Атырау мұнай өңдеу зауыттарын жаңғырту жұмыстарының барысы туралы мәлімдеді.

– Екі мұнай өңдеу зауытын жетілдіріп, жаңғырту биыл аяқталады. Қараша айында Павлодардағы зауытты іске қосу жоспарланып отыр. Атыраудағы мұнай өңдеу зауытындағы жұмыстарды осы жылдың 16 желтоқсанына дейін аяқтау көзделген. Мұнда мұнай өнімдерінің көлемін арттыруға және олардың сапасын жақсартуға мүмкіндік беретін каталитикалық крекинг құрылғысы бірінші рет пайдаланылатын болады.     

Қ.Бозымбаев Мемлекет басшысына Шымкенттегі мұнай өңдеу зауытында да жоғары октанды бензин шығаруға арналған каталитикалық крекинг құрылғысын салу жоспарланып отырғаны туралы мәлімдеді.   

Энергетика министрі келесі жылы Қазақстан нарығы жоғары сапалы жанармаймен, соның ішінде авиациялық жанармаймен қамтамасыз етілетінін айтты.