21 Сәуір, 2018 Аймақтар
Алматыда ірі сауда орталықтары тексерілді
Алматы қаласы да мұндай тексерістерден шет қалмады
Ресейдің Кемерово қаласында аса қайғылы оқиға орын алғаны белгілі. Сондағы «Зимняя вишня» сауда орталығында өрт болып, нәтижесінде 63 адам, оның ішінде 41 бала қайғылы қазаға ұшыраған еді. Осыған орай Қазақстан Үкіметі бірден өзіміздегі қауіпсіздік жағдайын қолға алды. Сөйтіп, тиісті орындар дереу ірі ойын-сауық сауда орындарын лаңкестіктен қорғау үшін жаппай тексеріске алды.
Әрине, Алматы қаласы да мұндай тексерістерден шет қалмады. 2015 жылы ҚР Үкіметінің «Лаңкестік тұрғысындағы әрекеттер алдында әлсіз нысандарды лаңкестіктен қорғау жөніндегі» қаулысы қабылданған болатын. Соның негізінде екі топқа бөлінген көпшілік орындар қатаң тексеруге жатқызылды. Бұл ретте қалалық ІІД-нің Экстремизмге қарсы іс-әрекет жөніндегі басқармасы мен Жергілікті полиция қызметі бірлесіп мегаполистегі қоғамдық тамақтандыру орындарын, ойын-сауық сауда орталықтарын, стадиондарды, сосын балабақшалар мен мектептерді, колледждер мен университеттерді және басқа әлеуметтік маңызды нысандарды тексеріп шықты.
Бұл үшін басты назар олардың антитеррористік қорғалуына бөлінді. Ол үшін әр нысанда лаңкестікке қарсы үлгілі төлқұжат болуы керек екен. Ал ол құжатта аталған нақты ғимараттың аумағы қанша болуы керектігі және ол қанша орынға лайықталғаны көрсетілуі қажет. Әрі олардың барлығы күзет дабылы, жүйелі хабарлау, қадағалау және кіріп-шығуды басқару, сондай-ақ, жүйелік бейнебақылау құралдарымен міндетті түрде жабдықталуы тиіс болатын.
Міне, осы талаптар тиісті деңгейде орындалмаған жағдайда лаңкестік тұрғыда әлсіз деп танылған нысан иесі немесе жетекшісі кінәлі деп табылады және ҚР ӘЖ Кодексінің 149-бабының 1-тармағы бойынша жеке және лауазымды тұлғаларға 200 АЕК, ал шағын кәсіпкерлік немесе коммерциялық емес ұйымдар субъектілері үшін – 300 АЕК, орта кәсіпкерлік субъектілері үшін – 500 АЕК және ірі кәсіпкерлік субъектілер үшін – 1000 АЕК көлемінде айыппұл салынады.
Аталған тексерістер қорытындысы бойынша алматылық ойын-сауық сауда орталықтарының иелері мен басшыларына барлығы 20 млн. теңге көлемінде айыппұлдар салынған. Оның үстіне, биылғы жылдың екінші тоқсанында сауда орталықтары мен қоғамдық тамақтандыру орындарын тағы да тексеру жоспарланған. Соған дейін бірінші тексеруде анықталған кемшіліктердің бәрі жойылып бітуі тиіс.
Алматы ақшамы
Қате тапсаңыз, қажетті бөлікті таңдап ctrl+enter басыңыз.
Пікір қалдыру
пікір